దిక్కు లెల్లా సాధించి దేవదుందుభులు మ్రోయ

మాళవి
దిక్కు లెల్లా సాధించి దేవదుందుభులు మ్రోయ-
నెక్కడ చూచినఁ దానే యేఁగీ సేవించరో. IIపల్లవిII

అదివో శ్రీహరితేరు అదె గరుడధ్వజము
కదలేటి ఘనతురంగము లవిగో
పొదలుఁ బూదండ లవే పూఁచి వాఁగే ఘంటలవే
యెదుటఁ దిరువీధుల నేగీ సేవించరో. IIదిక్కుII

వారె అచ్చరలేమలు వారె మునులు రుషులు
వారక కొలిచే దేవతలు వారే
వీరే యనంతగరుడవిష్వక్సేనాదులు
యీరీతిఁ బ్రతాపాన నేఁగీ సేవించరో. IIదిక్కుII

వీఁడె శ్రీవేంకటేశుఁడు వీఁ డలమేల్మంగపతి
వీఁడె శంఖచక్రాదుల వెలసినాఁడు
పోఁడిమి వరములిచ్చీఁ బొసఁగ దాసులకెల్లా
యేఁడేఁడు దప్పకుండాను యేఁగి సేవించరో. IIదిక్కుII౩-౫౦౧

భావయామి గోపాలబాలం మన-

Get this widget | Track details | eSnips Social DNA

ధన్నాసి
భావయామి గోపాలబాలం మన-
స్సేవితం తత్పదం చింతయేయం సదా IIపల్లవిఈఈ

కటిఘటితమేఖలాఖచితమణిఘంటికా-
పటలనినదేన విభ్రాజమానం
కుటిలపదఘటితసంకుల శింజితే నతం
చతులనతనాసముజ్జ్వలవిలాసం. IIభావII

నిరతకరకలితనవనీతం బ్రహ్మాది-
సురనికరభావనాశోభితపదం
తిరువేంకటాచలస్థిత మనుపమం
హరిం పరమపురుషం గోపాలబాలం. IIభావII
అన్నమయ్య సంకీర్తనలలో సాధారణంగా మూడేసి చరణాలు ఉంటాయి. కాని ఈ సంకీర్తనలో మాత్రం రెండు చరణాలు మాత్రమే ఉన్నాయెందుచేతనో. ఇది సంస్కృతభాషలో రచింపబడిన సంకీర్తన. అర్థం చేసుకొనే ప్రయత్నం చేద్దాం.నాకు సంస్కృతభాషా పరిచయం బాగా తక్కువ.అయినా ఎలానో అలా తెలుసుకునే ప్రయత్నం చేస్తున్నాను.తప్పులను- పెద్దలు, తెలిసినవారూ- తెలియజేస్తే కృతజ్ఞుడిని. భావయామి=భావించుచున్నాను
గోపాలబాలం=బాలునిరూపంలో ఉన్న గోపాలుని
సదా=ఎల్లప్పుడూ
మనస్సేవితం=మనస్సుతో సేవించబడుచున్న
తత్ పదం=ఆ గోపాలబాలుని పదములను
చింతయ ఇయం=నేను చింతనచేస్తున్నాను


కటి=కటిప్రదేశము(నడుము భాగము)నందు
ఘటిత=ఉంచబడిన
మేఖలా=వడ్డాణముయందు
ఖచితమణిఘంటికా=తాపడము చేయబడ్డ మణులఘంటలయొక్క
పటల=సమూహము
విభ్రాజమానం=ప్రకాశితమగుచున్నది.
కుటిలపదఘటిత=వంకరగానున్నపదములయందుంచబడిన
శింజితే నతం=మువ్వలచప్పుడు(?),శింజితానతం అని ఉండవచ్చేమో అంటూ ఏమైనా అర్థమంత సరిగా దోపదు అని అథోసూచికలో సూచించారు.
చటులనటనా=నటనలతో చలించున్న
సముజ్జ్వలవిలాసం=సముజ్జ్వలమైన విలాసముతో కూడుకున్నది
నిరత=మిక్కిలి ఆసక్తికొన్న
కరకలిత=అరచేతియందలి
నవనీతం=వెన్నపూస
బ్రహ్మాదిసురనికరభావనాశోభితపదం =బ్రహ్మదేవుడు మొదలుగాగల దేవతల సమూహము చేత భావింపబడిన అందమైన పదములు
తిరువేంకటాచలస్థితమ్=శ్రీవేంకటాచలపర్వతమందున్న
అనుపమం హరిం=చక్కనివాడైన శ్రీహరిని
పరమపురుషం=పరమపురుషుడైన
గోపాలబాలం=గోపాలబాలునిని
భావయామి=భావించుచున్నాను.

కొమ్మలు చూడరె గోవిందుఁడు

సాళంగనాట
కొమ్మలు చూడరె గోవిందుఁడు
కుమ్మరించీ ముద్దు గోవిందుఁడు. IIపల్లవిII

దిట్ట బాలులతోఁ దిరిగి వీధుల
గొట్టీ నుట్లు గోవిందుఁడు
పట్టినకోలలు పై పైఁ జాఁపుచు
కుట్టీఁ దూంట్లుగా గోవిందుఁడు. IIకొమ్మII

నిలువుఁగాశతో నిడిగూఁతలతో
కొలకొలమని గోవిందుఁడు
వలసినపాలు వారలువట్టుచు
కులికి నవ్వీ గోవిందుఁడు.IIకొమ్మII

బారలు చాఁపుచుఁ బట్టఁగ నింతులఁ
గూరిమిఁ గూడీ గోవిందుఁడు
చేరి జవ్వనుల శ్రీవేంకటాద్రిపై
గోరఁ జెనకీ గోవిందుఁడు.IIకొమ్మII౩-౧౪౨

నిలువు గాశతో నా నిలువు గాళతో నా

తానెంత బ్రదుకెంత దైవమా నీమాయ యెంత

సాళంగనాట
తానెంత బ్రదుకెంత దైవమా నీమాయ యెంత
మానవుల లంపటాలు మరి చెప్పగలదా. IIతానెంతII

చెలఁగి నేలఁ బారేటి చీమసహితమును
కలసి వూరకే పారుఁ గమ్మర నెందోమరలు
తలమోచి కాఁపురము ధాన్యములు గూడపెట్టు
యిల సంసారము దనకిఁక నెంతదలదో. IIతానెంతII

యేడో బాయిటఁ బారే యీఁగ సయితమును
వాడుదేర నడవుల వాలి వాలి
కూడపెట్టుఁ దేనెలు గొందుల బిల్లలఁబెట్టు
యేడకేడ సంసార మిఁక నెంతగలదో. IIతానెంతII

హెచ్చి గిజిగాండ్లుసయిత మెంతోగూఁడువెట్టు
తెచ్చి మిణుఁగురుఁబురువు దీపమువెట్టు
తచ్చి శ్రీవేంకటేశ నీదాసులు చూచి నగుదు-
రిచ్చలఁ దానిసంసార మిఁక నెంత గలదో. IIతానెంతII౩-౪౬౮


అన్నమయ్య ఈ సంకీర్తనలో మానవులు తమ తమ బ్రతుకులను నడిపించుకోడానికి పడే శ్రమములను-చీమ,యీఁగ,గిజిగాడు,మిణుగురు పురువు వంటివాటి శ్రమములతో పోల్చి చూపిస్తూ ఇవన్నీ చూచి శ్రీవేంకటేశ్వరునికి దాసులైనవారు నవ్వుకుంటారు అని చెపుతున్నాడు.

పసిఁడియక్షంత లివె పట్టరో వేగమే రారో

Get this widget | Track details | eSnips Social DNA

సామంతం
పసిఁడియక్షంత లివె పట్టరో వేగమే రారో
దెసలఁ బేరటాండ్లు దేవుని పెండ్లికిని. IIపల్లవిII

శ్రీవేంటేశ్వరునికి శ్రీమహాలక్ష్మికి
దైవికపుఁ బెండ్లిముహూర్తము నేఁడు
కావించి భేరులు మ్రోసె గరుడధ్వజం బెక్కె
దేవతలు రారో దేవుని పెండ్లికిని. IIపసిఁడిII

కందర్ప జనకునికిఁ గమలాదేవికిఁ బెండ్లి
పందిలిలోపలఁ దలఁబాలు నేఁడు
గందమూ విడె మిచ్చేరు కలువడాలు గట్టిరి
అందుక మునులు రారో హరి పెండ్లికిని.IIపసిఁడిII

అదె శ్రీవేంకటపతి కల మేలుమంగకును
మొదలితిరునాళ్ళకు మొక్కేము నేఁడు
యెదుట నేఁగేరు వీరె యిచ్చేరు వరము లివె
కదలి రారో ఘనుల పెండ్లికిని. IIపసిఁడిII౩-౧౯౪

వినరో భాగ్యము విష్ణుకథ

దేవగాంధారి
వినరో భాగ్యము విష్ణుకథ
వెనుబలమిదివో విష్ణుకథ. IIవినII

ఆదినుండి సంధ్యాదివిధులలో
వేదంబయినది విష్ణుకథ
నాదించీనిదె నారదాదులచే
వీదివీఛులనె విష్ణుకథ. IIవినII

వదలక వేదవ్యాసులు నుడిగిన-
విదితపావనము విష్ణుకథ
సదనంబైనది సంకీర్తనయై
వెదకినచోటనే విష్ణుకథ. IIవినII

గొల్లెతలు చల్ల గొనకొని చిలుకఁగ
వెల్లవిరియాయ విష్ణుకథ
యిల్లిదె శ్రీవేంకటేశ్వరునామము
వెల్లిగొలిపె నీవిష్ణుకథ. IIవినII౩-౩౫౫

శరణన్న విభీషణుఁ గరుణఁ గాచినవాఁడు

శంకరాభరణం
శరణన్న విభీషణుఁ గరుణఁ గాచినవాఁడు
పరికింపఁ దారకబ్రహ్మమా యీ రాముఁడు. IIపల్లవి

ఆలికై విల్లు విఱిచి వాలికై యమ్ము వేసిన-
వాలుమగఁటిమిగలవాఁడా వీఁడు
ఱాలను జలధిగట్టి కేలను మోక్షమిచ్చి
యేలెను జటాయువును యీతఁడా రాముఁడు. IIశరII

మింటికట్లు దెగవేసి యంటి పగసాధించి
దంటరాకుమారుఁడు తా నీశూరుఁడా
బంటుగా వాయుజు నేలి నంటు సుగ్రీవుతోఁ జేసి
కంటకరావణవైరి ఘనుఁడా యీరాముఁడు. IIశరII

రాకాసుల మర్దించి కాకాసురు నటు గాచి
మైకొన్న జానకీరమణుఁ డితఁడా
యీకడ శ్రీవేంకటాద్రి నిరవై తాను నున్నాఁడు
దీకొన్న ప్రతాపపుఁదేవుఁడా యీరాముఁడు.IIశరII౨-౨౨౬

"మింటికట్లు దెగవేసి యంటి పగసాధించి
దంటరాకుమారుఁడు తా నీశూరుఁడా"---ఇది అర్థం కాలేదు. ఎవ్వరైనా తెలిస్తే చెప్పరూ--

తిరుమలగిరిరాయ దేవరాహుత్తరాయ

దేసాళం
తిరుమలగిరిరాయ దేవరాహుత్తరాయ
సురతబిన్నాణరాయ సుగుణకోనేటిరాయ. IIపల్లవిII

సిరులసింగారరాయ చెలువపుతిమ్మరాయ
సరసవైభవరాయ సకలవినోదరాయ
వరవసంతములరాయ వనితలవిటరాయ
గురుతైన తేగరాయ కొండలకోనేటిరాయ. IIతిరుII

గొల్లెతల వుద్దండరాయ గోపాల కృష్ణరాయ
చల్లువెదజాణరాయ చల్లఁబరిమళరాయ
చెల్లుబడిధర్మరాయ చెప్పరానివలరాయ
కొల్లలైన భోగరాయ కొండలకోనేటిరాయ. IIతిరుII

సామసంగీతరాయ సర్వమోహనరాయ
ధామవైకుంఠరాయ దైత్యవిభాళరాయ
కామించి నిన్నుఁ గోరితే గరుణించితివి నన్ను
శ్రీమంతుఁడ నీకు జయ శ్రీవేంకటరాయ. IIతిరుII ౨-౪౬౨

లేదు భయము మఱి కాదు భవము

శంకరాభరణం
లేదు భయము మఱి కాదు భవము
ఆదియు నంత్యముఁ దెలిసిన హరియాజ్ఞేకాన. IIపల్లవిII

తలఁపులుగడుగక వొడ లటు తాఁ గడిగిన నేమి
వెలుపలికాంక్షలు వుడుగక విధులుడిగిన నేమి
అలరుచు శ్రీహరిదాస్యము ఆతుమఁ గలిగినయాతడు
చెలఁగుచు పనులైనా సేసిన మరి యేమి. IIలేదుII

పొంచినకోపము విడువక భోగము విడిచిన నేమి
పంచేంద్రియములు ముదియక పై ముదిసిన నేమి
నించిన దైవము నమ్మిన నిర్భరుఁడయినయాతఁడు
యెంచుక యేమార్గంబుల నెట్టుండిన నేమి. IIలేదుII

వేగమె లోపల గడుగక వెలి గడిగిన నేమి
యోగము దెలియక పలుచదువులు దెలిసిన నేమి
యీగతి శ్రీ వేంకటపతి నెఱిఁగి సుఖించేటియాతఁడు
జాగుల ప్రపంచమందును సతమైనా నేమి. IIలేదుII ౨-౫౮

అని యానతిచ్చెఁ గృష్ణుఁ డర్జునునితో

Get this widget | Track details | eSnips Social DNA

లలిత
అని యానతిచ్చెఁ గృష్ణుఁ డర్జునునితో
విని యాతని భజించు వివేకమా. IIపల్లవిII

"భూమిలోను చొచ్చి సర్వభూతప్రాణులనెల్ల
దీమసాననే మోచేటి దేవుఁడ నేను
కామించి సస్యములు గలిగించి చంద్రుఁడనై
తేమల బండించేటి దేవుఁడ నేను. IIఅనిII

దీపనాగ్నినై జీవదేహముల యన్నములు
తీపుల నరగించేటి దేవుఁడ నేను
యేపున నిందరిలోనిహృదయములోన
దీపింతుఁ దలఁపు మరపై దేవుఁడ నేను. IIఅనిII

వేదము లన్నిటిచేతా వేదాంతవేత్తలచేతా
ఆది నే నెరఁగదగినయాదేవుఁడను
శ్రీ దేవితోఁ గూడి శ్రీవేంకటాద్రిమీఁద
పాదైనదేవుఁడను భావించ నేను." IIఅనిII ౨-౪౩౮

అన్నిటా శ్రీహరి దాసుడగువానికి

రామక్రియ
అన్నిటా శ్రీహరి దాసుడగువానికి
కొన్ని దైవములఁ గొలువఁగ దగునా. IIపల్లవిII

విహిత కర్మము సేసి వెదకేటిహరి నిట్టె
సహజమై కొలచేటిసరసునికి
గహనపుఁగర్మాలు కడమలైననేమి
మహిఁ గనకాద్రికి మరి పైఁడి వలెనా. IIఅన్నిII

పలుదానములకెల్ల బలమైనహరి నిట్టె
బలువుగఁ జేకొన్న భక్తునికిని
నెలకొని యాతఁ డన్నియునుఁ జేసినవాఁడె
తెలిసి సూర్యునిఁ జూడ దీపాలు వలెనా. IIఅన్నిII

వేదవేద్యుఁడు శ్రీవేంకటపతినామ-
మాదిగాఁ బఠియించే యధికునికి
ఆదైన చదువులు అఱచేతి వతనికి
మేదినిఁ దిరుగాడ మెట్లు వలెనా. IIఅన్నిII౨-౬౮

వెఱ్ఱులాల మీకు వేడుక గలితేను

రామక్రియ
వెఱ్ఱులాల మీకు వేడుకగలితేను
అఱ్ఱువంచి తడు కల్లంగరాదా. IIపల్లవిII

ముడిచివేసినపువ్వు ముడువయోగ్యము గాదు
కుడిచివేసినపుల్లె కుడువఁగాఁ గాదు
బడి నొకరుచెప్పినఁ బ్రతి చెప్పఁబోతేను
అడరి శ్రీహరి కది అరుహము గాదు. IIవెఱ్ఱుII


గంపెఁ డుముక దినఁగా నొక్క వరిగింజ
తెంపునఁ గలసితే తెలియ నెట్టు వచ్చు
జంపులఁ బలవరించఁగ నొక మంచిమాట
ఇంపైతే హరి యందుకిచ్చునా వరము. IIవెఱ్ఱుII

వుమిసిన తమ్మలో నొకకొంత కప్రము
సమకూర్చి చవిగొని చప్పరించనేల
అమరఁగ ఛాయాపహారము సేసుక
తమమాట గూర్చితే దైవము నగఁడా. IIవెఱ్ఱుII

చిబికివేసినగింజ చేతఁ బట్టఁగనేల
గబుక కెంగిలిబూరెఁ గడుగఁగ మరి యేల
తొబుకకవిత్వాల దోషాలఁ దొరలితే
గిబుకార నవ్వడా దేవుఁడైనాను. IIవెఱ్ఱుII

మించుచద్దికూటిమీఁద నుమిసినట్టు
మంచి దొకటి చెప్పి మరిచెప్పనేరక
కంచుఁ బెంచు నొక్కగతి నదికితే ముట్టు-
పెంచువలెనే చూచు పెరుమాళ్ళు వాని. IIవెఱ్ఱుII

పుచ్చినట్టిపండుబూఁజి లోననే వుండు
బచ్చనకవితలు బాఁతిగావు యెందు
ముచ్చుఁ గన్నతల్లి మూల కొదిగినట్టు
ముచ్చిమి నుతులేల మొక్కరో హరికి. IIవెఱ్ఱుII

వుల్లిదిన్న కోమ టూరకవున్నట్టు
జల్లెడ నావాలు జారిపోయినట్టు
కల్లలు చెప్పి యాకథ కుత్తరము లీక
మెల్లనే వుండితే మెచ్చునా దైవము. IIవెఱ్ఱుII

నేతిబీరకాయ నేయి అందు లేదు
రాతివీరునికి బీరము ఇంచుకా లేదు
ఘాత బూరుగుఁబండుకడుపులోన దూది
యేతులనుడుగులు యెక్కునా హరికి. IIవెఱ్ఱుII

ఇరుగువా రెరఁగరు పొరుగువా రెరఁగరు
గొరబైనమాటలు గొణఁగుచు నుందురు
పరులఁ గాదందురు బాఁతిగారు తాము
విరసు లట్టివారి విడుచు దేవుఁడు. IIవెఱ్ఱుII

యెన్నఁగ శ్రీవేంకటేశుఁ దాళ్ళపాక
అన్నమాచార్యులు అఖిలదిక్కులు మెచ్చ-
నున్నతితోఁ బాడి రొకఁ డెవ్వఁడో తాను
సన్న నొరసునట సమ్మతా హరికి. IIవెఱ్ఱుII౨-౪౯౪



గలితేను=గలిగితేను
అఱ్ఱువంచి=కంఠమువంచి(?),తడుకు= తోట లోనగువాని చుట్టునేర్పడిచెడు వెలుగు
పుల్లె=విస్తరాకు
అరుహము=అర్హము
ఉముక=పొట్టు
జంపులఁ=ఆలస్యముగ(?)
ఛాయాపహారము=కాంతితగ్గుదల
చిబికి=చప్పరించిన
గబుక=?
తొబుక=సారము లేని
గిబుకార=?(మనసార?)
కంచుఁ బెంచు=?
ముట్టుపెంచు=?
బూఁజి=బూఁజు
బచ్చన=?
ముచ్చిమి=?
రాతివీరునికి=?
ఘాత=దెబ్బ
యేతులనుడుగులు=?
గొరబైన=?
బాఁతి=భ్రాంతి
సన్న నొరసునట=?

బ్రహ్మ మొకటె పరబ్రహ్మ మొకటె పర

Get this widget | Track details | eSnips Social DNA

బౌళి
తందనాన ఆహి తందనాన పురె
తందనాన భళా తందనాన. IIపల్లవిII

బ్రహ్మ మొకటె పరబ్రహ్మ మొకటె పర
బ్రహ్మ మొకటే పరబ్రహ్మ మొకటే IIతందII

కందువగు హీనాధికము లిందు లేవు
అందరికి శ్రీహరే అంతరాత్మ
ఇందులో జంతుకుల మింతా నొకటే
అందరికి శ్రీహరే అంతరాత్మ. IIతందII

నిండార రాజు నిద్రించు నిద్రయు నొకటే
అండనే బంటునిద్రదియు నొకటే
మెండైన బ్రాహ్మణుఁడు మెట్టుభూమి యొకటే
ఛండాలుఁ డుండేటి సరిభూమిి యొకటె.IIతందII

అనుగుదేవతలకు అలకామసుఖ మొకటే
ఘనకీటపశువులకు కామసుఖ మొకటె
దినమహోరాత్రములు తెగి ధనాఢ్యున కొకటే
వొనర నిరుఁ బేదకును వొక్కటే అవియు.IIతందII

కొరలి శిష్టాన్నములు గొనునాఁక లొకటే
తిరుగు దుష్టాన్నములు దినునాఁక లొకటే
పరగ దుర్గంధములపైవాయువు నొకటే
వరుసఁ బరిమళముపై వాయువు నొకటే.IIతందII

కడఁగి యేనుఁగు మీఁదఁ గాయుయెండొకటే
పుడమి శునకము మీఁదఁ బొలయునెండొకటే
కడుఁబుణ్యులను పాపకర్ములను సరిఁ గావ
జడియు శ్రీవేంకటేశ్వరు నామ మొకటే.IIతందII౨-౩౮౫

చాలదా బ్రహ్మ మిది సంకీర్తనం మీకు

సామంతం
చాలదా బ్రహ్మ మిది సంకీర్తనం మీకు
జాలెల్ల నడఁగించు సంకీర్తనం. IIపల్లవిII

సంతోషకరమైన సంకీర్తనం
సంతాప మణగించు సంకీర్తనం
జంతువుల రక్షించు సంకీర్తనం
సంతతముఁ దలఁచుఁ డీసంకీర్తనం. IIచాలII

సామజముఁ గాచినది సంకీర్తనం
సామమున కెక్కు డీసంకీర్తనం
సామీప్య మిందరికి సంకీర్తనం
సామాన్యమా విష్ణుసంకీర్తనం. IIచాలII

జముబారి విడిపించు సంకీర్తనం
సమబుద్ధి వొడమించు సంకీర్తనం
జమళి సౌఖ్యములిచ్చు సంకీర్తనం
శమదమాదులఁ జేయు సంకీర్తనం. IIచాలII

జలజాసనునినోరిసంకీర్తనం
చలిగొండ సుతదలఁచు సంకీర్తనం
చలువ గడు నాలుకకు సంకీర్తనం
చలపట్టి తలఁడుఁ డీ సంకీర్తనం. IIచాలII

సరవి సంపదలిచ్చు సంకీర్తనం
సరిలేని దిదియపో సంకీర్తనం
సరుస వేంకటవిభుని సంకీర్తనం
సరుగుననుఁ దలచుఁ డీసంకీర్తనం. IIచాలII ౧-౩౪౩

నారాయణా నీనామమె గతి యిఁక

లలిత
నారాయణా నీనామమె గతి యిఁక
కోరికలు నాకుఁ గొనసాగుటకు. IIపల్లవిII

పైపై ముందట భవజలధి
దాపు వెనకఁ జింతాజలధి
చాపలము నడుమ సంసారజలధి
తేప యేది యివి తెగనీఁదుటకు. IIనారాII

పండె నెడమఁ బాపపురాశి
అండఁ గుడిని పుణ్యపురాశి
కొండను నడుమఁ ద్రిగుణరాశి - యివి
నిండఁ గుడుచుటకు నిలుకడ యేది. IIనారాII

కిందులోకములు కీడునరకములు
అందేటిస్వర్గా లవె మీఁద
చెంది యంతరాత్మ శ్రీవేంకటేశ నీ -
యందె పరమపద మవల మరేది. IIనారాII
౪-౩౮౮

ఇటు గరుడని నీవెక్కినను

Get this widget | Track details | eSnips Social DNA

నాట
ఇటు గరుడని నీవెక్కినను
పటపట దిక్కులు బగ్గనఁ బగిలె. IIపల్లవిII

ఎగసినగరుడని యేపున 'ధా'యని
జిగిదొలఁక చబుకుచేసినను
నిగమాంతంబులు నిగమసంఘములు
గగనము జగములు గడగడ వడఁకె. IIఇటుII

బిరుసుగ గరుడని పేరెము దోలుచు
బెరసి నీవు గోపించినను
సరుస నఖిలములు జర్జరితములై
తిరువున నలుగడ దిరదిరఁ దిరిగె. IIఇటుII

ప ల్లించిననీపసిఁడిగరుడనిని
కెల్లున నీ వెక్కినయపుడు
ఝల్లనె రాక్షససమితి నీమహిమ-
వెల్లి మునుఁగుదురు వేంకటరమణా. IIఇటుII ౧-౯౨

వలెననువారిదె వైష్ణవము యిది

మలహరి
వలెననువారిదె వైష్ణవము యిది
వలపుఁదేనెవో వైష్ణవము. IIపల్లవిII

కోరిక లుడుగుచు గుఱి నిన్నిటిపై
వైరాగ్యమెపో వైష్ణవము
సారెకుఁ గోపముఁ జలమునుఁ దనలో
వారించుటవో వైష్ణవము. IIవలెII

సుడిగొనుదేహపుసుఖదుఃఖములో
వడిఁ జొరనిదెపో వైష్ణవము
ముడివడి యింద్రియములకింకరుఁడై
వడఁ బడనిదెపో వైష్ణవము. IIవలెII

వుదుటునఁ దన సకలోపాయంబులు
వదలుటపో నిజవైష్ణవము
యెదుటను శ్రీవేంకటేశ్వరునామము
వదనము చేర్చుట వైష్ణవము. IIవలెII ౧-౪౦౫

దేవ ఈ తగవు దీర్చవయ్యా

Get this widget | Track details | eSnips Social DNA

మలహరి
దేవ ఈ తగవు దీర్చవయ్యా
వేవేలకు నిది విన్నపమయ్యా. IIపల్లవిII

తనువునఁ బొడమినతతి నింద్రియములు
పొనిగి యెక్కడికిఁ బోవునయా
పెనఁగి తల్లికడ బిడ్డలు భువిలో
యెనగొని యెక్కడి కేఁగుదురయ్యా. IIదేవII

పొదుగుచు మనమునఁ బొడమినయాసలు
అదన నెక్కడికి నరుగునయా
నొదుగుచు జలములనుండుమత్స్యములు
పదపడి యేగతిఁ బాసీనయ్యా. IIదేవII

లలి నొకటొకటికి లంకెలు నివే
అలరుచు నేమని యందునయా
బలుశ్రీవేంకటపతి నాయాత్మనుఁ
గలిగితి వెక్కడి కలుషములయ్యా. IIదేవII౧-౪౩౫

ఇప్పు డిటి కలగంటి నెల్లలోకములకు-

Get this widget | Track details | eSnips Social DNA

భూపాళం
ఇప్పు డిటు కలగంటి నెల్లలోకములకు-
నప్పఁ డగు తిరువేంకటాద్రీశుఁ గంటి. IIపల్లవిII

అతిశయంబైన శేషాద్రిశిఖరము గంటి
ప్రతిలేని గోపురప్రభలు గంటి
శతకోటి సూర్యతేజములు వెలుఁగఁగఁ గంటి
చతురాస్యుఁ బొడగంటి చయ్యన మేలుకంటి. IIఇప్పుII

కనకరత్న కవాటకాంతు లిరుగడఁ గంటి
ఘనమైనదీపసంఘములు గంటి
అనుపమమణిమయమగుకిరీటము గంటి
కనకాంబరము గంటి గ్రక్కన మేలుకంటి. IIఇప్పుII

అరుదైన శంఖచక్రాదు లిరుగడఁ గంటి
సరిలేని యభయహస్తము గంటి
తిరువేంకటాచలాధిపునిఁ జూడఁగ గంటి
హరిఁ గంటి గురుఁ గంటి నంతట మేలుకంటి. IIఇప్పుII ౧-౩౮

ఏ పురాణముల నెంత వెదకినా

గుండక్రియ
ఏ పురాణముల నెంత వెదకినా
శ్రీపతిదాసులు చెడరెన్నఁడును. IIపల్లవిII

హరివిరహితములు అవి గొన్నాళ్ళకు
విరసంబులు మరి విఫలములు
నరహరిఁ గొలి చిటు నమ్మినవరములు
నిరతము లెన్నఁడు నెలవులు చెడవు. IIఏపుII

కమలాక్షుని మతిఁగాననిచదువులు
కుమతంబులు బహుకుపథములు
జమళి నచ్యుతునిసమారాధనలు
విమలములే కాని వితథముగావు. IIఏపుII

శ్రీవల్లభుగతిఁ జేరనిపదవులు
దావతులు కపటధర్మములు
శ్రీవేంకటపతి సేవించుసేవలు
పావనము లధికభాగ్యపుసిరులు. IIఏపుII ౨-౮౮



దావతులు=?