వలపువో కారణము వైభవంబులకుఁ దమ

సామంతం
వలపువో కారణము వైభవంబులకుఁ దమ
తలఁ పువో సకలంబుఁ దగులు సేసినది। IIపల్లవిII

చూపువో ప్రియములకుఁ జోటుసేసినది తరి
తీపువో వెడయాస దీరనీయనిది
రూపువో సౌఖ్యంబు రుచిసేసినది పువ్వుఁ
దూపువో హృదయంబు దూరిపాఱినది। IIవలపుII

ఒరపువో పెడఁబాసి వుండనియ్యనిది తమ
వెఱపువో దేహంబు వెచ్చఁజేసినది
మఱపువో ధైర్యంబు మానిపించినది కను
గిఱుపువో సిగ్గెలఁ గ్రిందుపఱిచినది। IIవలపుII

చెలిమివో కారణము శ్రీవేంకటేశుకృప
కలిమినో మచ్చికలు కలుగఁజేసినది
ఎలమివో యీపొందు లితవు సేసినది మరు
బలిమివో కోరికలఁ బట్టి తెచ్చినది। IIవలపుII ౬-౧౫౯