అణు రేణు పరిపూర్ణమైనరూపము

దేవగాంధారి
అణు రేణు పరిపూర్ణమైనరూపము
అణిమాదిసిరి యంజనాద్రిమీఁదిరూపము. IIపల్లవిII

వేదాంతవేత్తలెల్లా వెదకెటి రూపము
ఆదినంత్యములేని యారూపము
పాదుగ యోగీంద్రులు భావించురూపము
యీదెస నిదివో కోనేటిదరిరూపము. IIఅణుII

పాలజలనిధిలోనఁ బవళించేరూపము
కాలపు సూర్యచంద్రాగ్నిగలరూపము
మేలిమి వైకుంఠాన మెరసినరూపము
కీలైన దిదే శేషగిరిమీఁదిరూపము. IIఅణుII

ముంచిన బ్రహ్మాదులకు మూలమైనరూపము
కొంచనిమఱ్ఱాకుమీఁది కొనరూపము
మంచి పరబ్రహ్మమై మమ్మునేలినరూపము
యెంచఁగ శ్రీవేంకటాద్రి నిదేరూపము. IIఅణుII ౨-౪౩౨

మంచం బెక్కిన పిమ్మట మరి వావియు లేదు

సామంతం
మంచం బెక్కిన పిమ్మట మరి వావియు లేదు
చంచల ముడిగిన పిమ్మట శంకకుఁ బనిలేదు. IIపల్లవిII

పదిలంబుగ సర్వాత్మక భావము దెలిసిన పిమ్మట
ముదమున నెవ్వరిఁ జూచిన మొక్కక పోరాదు
హృదయము పరమేశ్వరునకు నిరవై పోయిన పిమ్మట
యెదిరిని కెలఁకులఁ జూడను ఇతరము పనిలేదు. IIమంచంII

సకలేంద్రియములు హరిపై చయ్యనఁ బెట్టిన పిమ్మట
వొకటియు నోరికిఁ జవియును వొద్దిక పనిలేదు
వికసించిన పరిణామము వెల్లువ ముంచిన పిమ్మట
చికురము ముడువనుఁ గట్టను చీరకుఁ బనిలేదు. IIమంచంII

పరమాత్ముఁడు తిరువేంకటపతి యని తెలిసిన పిమ్మట
పరిపరి చదువుల లంపటములఁ బడఁ బనిలేదు
హరియే చైతన్మాత్మకుఁ డని తెలిసిన పిమ్మట
దురితములకుఁ బుణ్యములకు త్రోవే పనిలేదు. IIమంచంII౧౫-౪౫౫

చెప్పరాని మహిమల శ్రీదేవుఁడితడు

Get this widget | Track details | eSnips Social DNA

సామంతం
చెప్పరాని మహిమల శ్రీదేవుఁడితడు
కప్పి కన్నులపండుగగాఁ జూడరో. IIపల్లవిII

అద్దుచుఁ కప్పురధూళి యట్టె మేన నలఁదఁగా
వొద్దిక దేవునిభావ మూహించితేను
మద్దులు విరిచినట్టి మంచి బాలకృష్ణునికి
మద్దులకాంతి మేన మలసినట్టుండె. IIచెప్పII

అమరఁ దట్టుపుణుఁగు అవధరించఁగాను
తమితోఁ బోలికలెల్లఁ దచ్చి చూడఁగా
యమునానది నాఁగేట నండకుఁ దీసుకొనఁగా
యమునానది నలుపు అంటినయట్టుండె. IIచెప్పII

అంగముల శ్రీవేంకటాధిపున కింతటాను
సింగారించి సొమ్ములెల్లఁ జలరేఁగఁగా
బంగారపుటలమేలుమంగ నురాన నుంచగా
బంగారము మేననెల్లాఁ బరగినట్టుండె. IIచెప్పII ౩-౧౬౬

పురుషుండని శృతి వొగడీనట ఆపురుషుఁడు నిరాకారమట

బౌళి
పురుషుండని శృతి వొగడీనట ఆపురుషుఁడు నిరాకారమట
విరసవాక్యము లొండొంటికి నివి వింటే నసంబద్ధములు IIపల్లవిII

మొగమున బ్రాహ్మలు మొలిచిరట ఆమూరితి అవయవ రహితుఁడట
తగుబాహువులను రాజులట ఆతత్వమే యెంచఁగ శూన్యమట
పగటున తొడలను వైశ్యులట ఆబ్రహ్మము దేహము బయలట
అగపడి పాదాల శూద్రులట ఆతని రూపము లేదట. IIపురుషుంII

తనవందనమునుఁ గలదట దైవము తనుఁ జూడఁ గన్నులు లేవట
తనవిన్నపమునుఁ జేయునట ఆతనికిని వీనులు లేవట
తను యిచ్చినదే నైవేద్యంబట దైవము నోరే లేదట
తనయిచ్చేటిధూపంబును గలదట దైవముముక్కును లేదట. IIపురుషుంII

అంతాఁ దానే దైవమట యజ్ఞము లొరులకుఁజేయుటట
సంతతమునుఁ దా స్వతంత్రుఁడటా జపములవరముల చేకొంటట
చింతింపఁ దానే యోగియటా చేరువ మోక్షము లేదట
పంతపు శ్రీవేంకటపతిమాయలు పచారించిన వివియట. IIపురుషుంII
౨-౨౫౨
అతడిని వేదము పురుషుడు అని ఒకపక్క పొగడినదట.ఇంకోపక్క ఆ పురుషునికి ఆకారమే లేదట. ఈ రెండూ ఒకదానికొకటి వ్వ్యతిరేకమైన మాటలు,వింటే అసంబద్ధములుగా కనిపిస్తాయి.
ఆపురుషుని ముఖమునుండి బ్రాహ్మణులు పుట్టారట.ఇంకోప్రక్క ఆ మూర్తి అవయవ రహితుడని అంటున్నారు.
ఆతని బాహువులనుండి రాజులు జన్మించారట.ఎంచితే ఆ తత్వమే శూన్యమైనదట.
ప్రకటించగ ఆతని తొడలనుండి వైశ్యులు పుట్టారట.ఆ బ్రహ్మము యొక్క దేహము శూన్యమైనదట.
చూస్తే ఆతని పాదాలనుండి శూద్రులు జన్మించారట.ఇంకోప్రక్క ఆతనికి అసలు రూపమే లేదట.--పురుషుండని శృతి వొగడీనట.

తన దైవమునకు స్తుతిచేయుట ఉన్నదట.ఇంకోప్రక్క తను చూడటానికి కన్నులే లేవట.
తన విన్నపమును వినిపిస్తాడట.ఆతనికి వినడానికసలు చెవులే లేవట.
తను నైవేద్యాన్ని అర్పిస్తాడట.ఆ దైవానికి ఆరగించడానికి నోరే లేదట.
తను ధూపాన్ని ఇస్తాడట కాని ఆఘ్రాణించడానికి దైవానికసలు ముక్కే లేదట.--పురుషుండని శృతి వొగడీనట.

అంతా ఓ ప్రక్క తానే దైవమట.యజ్ఞాలనేమో ఇతరులకొరకు చేస్తాడట.
ఎల్లప్పడూ తాను పూర్తి స్వతంత్రుడట.ఇంకోప్రక్క జపాలు చేసి వరాలు కోరుతుంటాడట.
చితించగా తానే ఒక యోగి.కానీ ఆతని చేరువలో మోక్షమే లేదట.
ఇవన్నీ ఏమిటి?చూడగా చూడగా శ్రీవేంకటేశ్వరుని మాయలు కాక!--పురుషుండని శృతి వొగడీనట.

శరణు శరణు వేదశాస్త్రనిపుణ నీకు

సాళంగనాట
శరణు శరణు వేదశాస్త్రనిపుణ నీకు
అరుదైన రామకార్యధురంధరా IIపల్లవిII

హనుమంతరాయ అంజనాతనయా
ఘనవాయుసుత దివ్యకామరూప
అనుపమలంకాదహన వార్ధిలంఘన
జనసురనుత కలశాపురనివాస. IIశరణుII

రవితనయసచివ రావణవనాపహార
పవనవేగబలాఢ్య భక్తసులభ
భువనపూర్ణదేహా బుద్ధివిశారద
జవసత్వవేగ కలశాపురనివాస. IIశరణుII

సీతాశోకనాశన సంజీవశైలాకర్షణ
ఆతతప్రతాపశౌర్య అసురాంతక
కౌతుకశ్రీవేంకటేశుకరుణాసమేత
శాతకుంభవర్ణ కలశాపురనివాస. IIశరణుII౨-౩౪౭
కలశాపుర హనుమద్వర్ణన చేసాడిందులో అన్నమయ్య.రవితనయసుతసచివ=సుగ్రీవునిమంత్రి,శాతకుంభము=బంగారు,ఆతత=విరివియైన,

ఇట్లానే యోగలక్ష్య మెఱుఁగుకొంటే ఫలించు

సామంతం
ఇట్లానే యోగలక్ష్య మెఱుఁగుకొంటే ఫలించు
యెట్లయినా గురువాక్య మేమరకుఁడీ IIపల్లవిII

కాంతఁ దలచుకొంటేనే కామోద్రేకము వుట్టు
యింతలోఁ గూడెనా యేడకేడ సూత్రము
చింతకాయతొక్కు చూచితేనే నోరూరు
యెంతకెంతదవ్వుయేడకేడ సూత్రము. IIఇట్లాII

వీనుల మంచిమాటలు నింటేనే సంతోష ముబ్బు
యేనిజము గనె నేడకేడ సూత్రము
ఆనించితే నాలుకనే ఆరురుచులుఁ దెలిసీ
యీనెపమున నేడకేడ సూత్రము. IIఇట్లాII

ముక్కుకొనఁ బ్రాణ ముండి ముందువెనుకకు వచ్చి
యెక్కడ మోచున్న దేడ కేడ సూత్రము
చిక్కి శ్రీవేంకటేశుఁడు జీవుల కంతర్యామి
యిక్కు వెఱిఁగితే నీడ కిదే సూత్రము. IIఇట్లాII ౨-౨౩౪

దేవుఁడుగలవారికి దిగులుఁ జింతయు లేదు

Get this widget | Track details | eSnips Social DNA

శంకరాభరణం
దేవుఁడుగలవారికి దిగులుఁ జింతయు లేదు
శ్రీవిభుఁడే అన్నిటా రక్షించుఁగనక IIపల్లవిII

యేలికగల బంటుకు యేవిచారములేదు
వోలి మగఁడుగలాలికి వొప్పమి లేదు
పోళిమిఁ దండ్రిగలపుత్రుని కంగద లేదు
మేలుగాఁ బండినభూమికిఁ గరవు లేదు. IIదేవుఁడుII

బలముగలరాజుకు భయమేమియు లేదు
కలిమిగలవాని కక్కర లేదు
యిల నాచారవంతుని కేపాపమును లేదు
తలఁపుఁ బుణ్యముగల ఆతనికిఁ జేటు లేదు. IIదేవుఁడుII

గురువుగలవానికిఁ గొఱఁత యేమియు లేదు
పరముగలవానికి భ్రాంతులు లేవు
యిరవై శ్రవేంకటేశుఁ డిన్నిటా మాకుఁ గలఁడు
అరయ దాసులము మా కడ్డాఁకే లేదు. IIదేవుఁడుII ౨-౨౫౪

అంగద= ఆకలి,దుఃఖము
అడ్డాకు=?

ఏమి చెప్పే దిది యీశ్వరమాయలు

శ్రీరాగం
ఏమి చెప్పే దిది యీశ్వరమాయలు
దీముప్రతిమకును త్రిజగముఁ గలిగె IIపల్లవిII

మలమూత్రంబులమాంసపుముద్దకు
కులగోత్రంబులగుఱి గలిగె
తొలులు తొమ్మిదగు తోలుఁదిత్తికిని
పిలువఁగఁ బేరునుఁ బెంపునుఁ గలిగె. IIఏమిII

నెత్తురునెమ్ములనీరుబుగ్గకును
హత్తిన కర్మము లటు గలిగె
కొత్తవెంట్రుకలగుబురులగంతికి
పొత్తులసంసారభోగము గలిగె. IIఏమిII

నానాముఖములనరములపిడుచకు
పూనినసిగ్గులు భువిఁ గలిగె
ఆనుక శ్రీవేంకటాధిపుఁ డేలఁగ
దీనికిఁ బ్రాణము తిరముగఁ గలిగె. IIఏమిII

వేదములు నుతించఁగ వేడుకలు దైవారఁగ

శంకరాభరణం
వేదములు నుతించఁగ వేడుకలు దైవారఁగ
ఆదరించీ దాసుల మోహననారసింహుఁడు IIపల్లవిII

నెఱులజడలతోడ నిక్కుఁగర్ణములతోడ
కుఱుచకొమ్ములతోడ కోఱలతోడ
వుఱక సిరిఁ దొడపై నుంచుక సింహాసనాన
మెఱసీఁ బ్రతాపములు మేటి నారసింహుఁడు. IIవేదII

నిడుప మీసాలతోడ నిట్టూరుపులతోడ
మిడిగుడ్లతోఁ దెల్లనిమేనితోడ
వొడలసొమ్ములు వెట్టి వొడ్డోలగమై వుండి
కడు మంచివరాలిచ్చీ ఘననారసింహుఁడు. IIవేదII

చిలుకుగోళ్ళతోడ సెలవి నవ్వులతోడ
బలుజిహ్వతోడ యోగపట్టెముతోడ
అలరి శ్రీవేంకటాద్రి నహోబలగిరిని
అల ప్రంహ్లాదునిఁ గాచె నాదినారసింహుఁడు. IIవేదII ౨-౨౭౮

జయ జయ నృసింహ సర్వేశ

Get this widget | Track details | eSnips Social DNA

సాళంగనాట
జయ జయ నృసింహ సర్వేశ
భయహర వీర ప్రహ్లాదవరద IIపల్లవిII

మిహిరశశినయన మృగనరవేష
బహిరంతస్థలపరిపూర్ణ
అహినాయకసింహాసనరాజిత
బహుళ గుణగణ ప్రహ్లాదవరద IIజయII

చటుల పరాక్రమ సమఘనవిరహిత
నిటలనేత్ర మౌనిప్రణుత
కుటిలదైత్యతతి కుక్షివిదారణ
పటువజ్రనఖ ప్రహ్లాదవరద IIజయII

శ్రీ వనితాసంశ్రిత వామాంక
భావజకోటిప్రతిమాన
శ్రీవేంకటగిరిశిఖరనివాస
పావనచరిత ప్రహ్లాదవరద IIజయII౨-౨౬౮౯

వినరయ్య నరసింహ విజయము జనులాల

నాట
వినరయ్య నరసింహ విజయము జనులాల
అనిశము సంపదలు నాయువు నొసఁగును. IIపల్లవిII

మొదలఁ గొలువుకూటమున నుండి కశిపుఁడు
చదివించెఁ బ్రంహ్లాదుని శాస్త్రములు
అదన నాతఁడు నారాయణుఁడే దైవమనె
అదరిపడి దైత్యుఁడు ఆతనిఁ జూపుమనె. IIవినరయ్యII

అంతటఁ బ్రంహ్లాదుఁడు 'అన్నిటానున్నాఁ'డనియె
పంతమున దానవుఁడు బాలునిఁ జూచి
యెంతయుఁ గడఁకతోడ 'ఇందులోఁ జూపు'మని
చెంతనున్న కంబము చేతఁగొని వేసె. IIవినరయ్యII

అటమీఁదట బ్రహ్మాండం బదరుచు
కుటిలభయంకరఘోషముతో
చిట చిట చిటమని పెట పెట పెటమని
పటపట మనుచును బగిలెఁ గంబము. IIవినరయ్యII

కులగిరు లదరెను కుంభిని వడఁకెను
తలఁకిరి దైత్యులు తల్లడిలి
కలఁగెను జగములు కంపించె జగములు
ప్రళయకాలగతిఁ బాటిల్లె నపుడు. IIవినరయ్యII

ఘననారసింహుఁ డదె కంబమునందు వెడలె
కనుపట్టె నదిగొ చక్రజ్వాలలు
మునుకొని వెడలెఁ గార్ముకముక్తశరములు
కనకకశిపునకుఁ గలఁగె గుండియలు. IIవినరయ్యII

అడరె నద్దేవునికోపాగ్నులు బెడిదపు-
మిడుఁగురులతోడుత మిన్నులుముట్టి
పిడుగులు రాలేటి భీకర నఖరములు
గడుసు రక్కసునికి గాలములై తగిలె. IIవినరయ్యII

తొడికి పట్టి విష్ణుఁడు తొడమీఁద నిడుకొని
కడుపు చించెను వాని గర్వమడఁగ
వెడలెఁ జిల్లున వానివేఁడి నెత్తురు నింగికి
పొడి వొడియాయ శత్రుభూషణములెల్లను. IIవినరయ్యII

నెళ నెళన విరిచె నిక్క వాని యెముకలు
పెళ పెళ నారిచి పెచ్చు వెరిగె హరి
జళిపించి పేగులు జంద్యాలుగ వేసుకొనె
తళుకుఁగోరలు తళతళమని మెరిచె. IIవినరయ్యII

పెటలించి నరములు పెరికి కుప్పలు వేసి
గుటగుటమని రొప్పె గోవిందుఁడు
చిటిలించి కండలు చెక్కలు వారఁజెండి
కుటిలదానవుఁ జూచి 'ఖో'యని యార్చెను. IIవినరయ్యII

తెంచి శిరోజములు దిక్కులకు వాని-
పంచప్రాణములుగొనెఁ బరమాత్ముఁడు
అంచెల నీరీతిని ప్రంహ్లాదునిపగ నీఁగె
మించి దేవతలు మితిమీఱి జయవెట్టిరి. IIవినరయ్యII

అప్పు డిందిరాదేవి యంకమునఁ గూచుండె
వొప్పుగ శాంతమందె నహోబలేశుఁడు
తప్పక కోనేటిదండఁ దానై యిందును నందు
చిప్పిలి వరములిచ్చీ శ్రీవేంకటేశుఁడు. IIవినరయ్యII

అనిశము=ఎల్లప్పుడు
అదన=? (అప్పుడు?)
కడకతోడ=ప్రయత్నముతోడ
కార్ముకముక్తశరములు=వింటినుండి వెలువడిన బాణములు
అడరె=అతిశయించె
బెడిదపు=భయంకరమైన,అధికమైన
నఖరములు=గోళ్ళు
తొడికి=ఒడిసి
నెళ నెళన=విఱుగుటయందగుధ్వన్యనుకరణము
నిక్క=నిశ్చయముగా
అంకము=ఒడి

అన్ని మంత్రములు నిందే ఆవహించెను

Get this widget | Track details | eSnips Social DNA

లలిత
అన్ని మంత్రములు నిందే ఆవహించెను
వెన్నతో నాకుఁ గలిగె వేంకటేశుమంత్రము IIపల్లవిII
నారదుండు జపియించె నారాయణమంత్రము
చేరెఁ బ్రహ్లాదుఁడు నారసింహమంత్రము
కోరి విభీషణుఁడు చేకొనె రామమంత్రము
వేరె నాకుఁగలిగె వేంకటేశుమంత్రము IIఅన్నిII

రంగగు వాసుదేవమంత్రము ధ్రువుఁడు జపించె
నంగవించెఁ గృష్ణమంత్ర మర్జునుఁడును
ముంగిట విష్ణుమంత్రము మొగి శుకుఁడు పఠించె
వింగడమై నాకునబ్బె వేంకటేశుమంత్రము IIఅన్నిII

యిన్ని మంత్రములకెల్ల యిందిరానాథుఁడే గురి
పన్నినదిదియే పరబ్రహ్మమంత్రము
నన్నుఁగావఁ కలిగెఁబో నాకు గురుఁడియ్యఁగాను
వెన్నెలవంటిది శ్రీవేంకటేశు మంత్రము. IIఅన్నిII ౪-౪౩౮

రాముఁడు రాఘవుఁడు రవికులుఁ డితడు

Get this widget | Track details | eSnips Social DNA

పాడి
రాముఁడు రాఘవుఁడు రవికులుఁ డితడు
భూమిజకుఁ బతియైన పురుషనిధానము IIపల్లవిII

అరయఁ బుత్రకామేష్టియందుఁ బరమాన్నమున
పరగఁ జనించిన పరబ్రహ్మము
సురల రక్షింపఁగ నసురల శిక్షింపఁగ
తిరమై యుదయించినదివ్యతేజము. IIరాముడుII

చింతించే యోగీశ్వరుల చిత్తసరోజములలో
సంతతము నిలిచిన సాకారము
వంతలహగా మునులెల్ల వెదకి కనేయట్టి-
కాతులఁ జెన్నుమీరినకైవల్యపదము. IIరాముడుII

వేదవేదాంతములందు విజ్ఞానశాస్త్రములందు
పాదుకొనఁ బలికేటి పరమార్థము
పోదితో శ్రీవేంకటాద్రిఁ బొంచి విజనగరాన
ఆదికి సనాదియైన అర్చావతారము. IIరాముడుII ౪-౧౬౯

నీ నామమే మాకు నిధియు నిధానము

Nee Naamame.wma

భూపాళం
నీనామమే మాకు నిధియు నిధానము
నీనామమె యాత్మనిధానాంజనము IIపల్లవిII

నమో నమో కేశవ నమో నారాయణ
నమో నమో మాధవ నమో గోవింద
నమో నమో విష్ణు నమో మధుసూదన
నమో త్రివిక్రమ నమో వామనా IIనీనాII

నమో నమో శ్రీధర నమో హృషీకేశ
నమో పద్మనాభ నమో దామోదర
నమో సంరక్షణ నమో వాసుదేవ
నమో ప్రద్యుమ్నతే నమో యనిరుద్ధా. IIనీనాII

నమో పురుషోత్తమ నమో యధోక్షజ
నమో నారసింహ నమోస్తు యచ్యుత
నమో జనీర్దన నమోస్తు ఉపేంద్ర
నమో శ్రీవేంకటేశ నమో శ్రీకృష్ణా. IIనీనాII ౪-౪౨౫

హరి నామము కడు నానందకరము

Get this widget | Track details | eSnips Social DNA

భైరవి
హరి నామము కడు నానందకరము
మరుగవో మరుగవో మరుగవో మనసా. IIపల్లవిII

నలినాక్షునిశ్రీ నామము
కలిదోషహరము కైవల్యము
ఫలసారము బహుబంధమోచనము
తలఁచవో తలఁచవో తలఁచవో మనసా. IIహరిII

నగధరునామము నరకహరణము
జగదేకహితము సమ్మతము
సగుణ నిర్గుణము సాక్షాత్కారము
పొగడవో పొగడవో పొగడవో మనసా. IIహరిII

కడఁగి శ్రీవేంకటపతి నామము
బడిబడినే సంవత్కరము
అడియాలంబిల నతిసుఖమూలము
తడవవో తడవవో తడవవో మనసా. IIహరిII ౪-౪౦౯

వీధుల వీధుల విభుఁడేగీ నిదె

బాలకృష్ణప్రసాద్ గారి పాట ఇక్కడ వినండి.
http://www.esnips.com/urlapi/go/?URL=http://www.imesh.com/downloadmusic/?appid=142

Get this widget | Track details | eSnips Social DNA

సౌరాష్ట్రం
వీధుల వీధుల విభుఁడేగీ నిదె
మోదముతోడుత మొక్కరొ జనులు IIపల్లవిII

గరుడధ్వజ మదె కనకరథం బదె
అరదముపై హరి యలవాఁడె
యిరుదెసల నున్నారు యిందిరయు భువియు
పరఁగ బగ్గములు పట్టరో జనులు IIవీధులII

ఆడే రదివో యచ్చరలెల్లను
పాడేరు గంధర్వ పతులెల్లా
వేడుకతో వీడె విష్వక్సేనుఁడు
కూడి యిందరునుఁ జూడరో జనులు IIవీధులII

శ్రీవేంకటపతిశిఖరముచాయదె
భావింప బహువైభవము లవే
గోవిందనామపు ఘోషణ లిడుచును
దైవం బితఁడని తలచరో జనులు. IIవీధులII ౪-౨౮౬

దీనరక్షకుఁ డఖిలవినుతుఁడు దేవదేవుఁడు రాముఁడు

శుద్ధవసంతం
దీనరక్షకుఁ డఖిలవినుతుఁడు దేవదేవుఁడు రాముఁడు
జానకీపతిఁ గొలువుఁడీ ఘనసమరవిజయుఁడు రాముఁడు IIపల్లవిII

హరుని తారకబ్రహ్మమంత్రమై యమరిన యర్థము రాముఁడు
సురలఁ గాచి యసురల నడఁచిన సూర్యకులజుడు రాముఁడు
సరయువందును ముక్తి చూరలు జనుల కొసఁగెను రాముఁడు
హరియె యీతఁడు హరివిరించుల కాదిపురుషుడు రాముఁడు। IIదీనII


మునులరుషులకు నభయమొసఁగిన మూలమూరితి రాముఁడు
మనసులోపలఁ బరమయోగులు మరగు తేజము రాముఁడు
పనిచి మీఁదటి బ్రహ్మపట్టము బంటు కొసఁగెను రాముఁడు
మనుజ వేషము తోడ నగజకు మంత్రమాయను రాముఁడు। । IIదీనII ౨-౧౭౮

బలిమి మించిన దైవికముతో భక్తసులభుఁడు రాముఁడు
నిలిచి తన సరిలేని వేలుపు నిగమ వంద్యుడు రాముఁడు
మెలుపు శ్రీవేంకటగిరీంద్రము మీఁది దేవుఁడు రాముఁడు।
వెలసె వావిలిపాటి లోపలి వీరవిజయుఁడు రాముఁడు। IIదీనII ౨-౧౭౮

ఎదురు మాటలాడితి నీకు యీ తప్పును లోఁ గొను నీవు

సామంతం
ఎదురు మాటలాడితి నీకు యీ తప్పును లోఁ గొను నీవు
పదరఁగఁదగదు నీకు పంతము లిచ్చితిఁ గావఁగదే. IIపల్లవిII

మునుపే నే విన్నవించితిని విన నవధరించితివి నీవు
వెనక వేసుకో శరణు చొచ్చితిని విడువకు నన్ననుచు
ననుఁజూచి 'దేహి' యంటే 'నాస్తి' యనరాదు నీకు
ఘనయాచకుఁడను నేను కడుదాతవు నీవు. IIఎదురుII

వెదకి నిను వేఁడుకొంటిని విచ్చేసితివి మా యింటికి
వదలఁదగదు నీ భక్తి యొసఁగు నీ వాఁడను పాయకుమనుచు
పదిలంబుగ మొక్కిన చేతులు బలిమిఁ గోయరాదు
యిదివో బంటను నేను యేలినవాఁడవు నీవు. IIఎదురుII

మరిగి నీ ముద్రలు మోచితిని మన్నించితి విటు నను నీవు
కరుణతోడ నా యపరాధంబులు కడపు కావుమనుచు
యిరవై నీ పేరు వెట్టితే నియ్యకొనక పోరాదు
నరమాత్రుఁడ నే శ్రీవేంకటేశ నాయకుఁడవు నీవు। IIఎదురుII ౨-౨౯౯

చిక్కువడ్డ పనికిఁ జేసినదే చేఁత

శుద్ధవసంతం
చిక్కువడ్డ పనికిఁ జేసినదే చేఁత
లెక్కలేని యప్పునకు లేమే కలిమి। IIపల్లవిII

తగవులేమి కెదిరిధనమే తన సొమ్ము
జగడగానికి విరసమే కూడు
తెగుదెంపులేమికి దీనగతే దిక్కు
బిగువుఁ గూటికి వట్టి బీరమే తగవు। IIచిక్కుII

పతిలేనిభూమికి బలవంతుడే రాజు
గతిలేనికూటికిఁ గన్నదే కూడు
సతిలేనివానికి జరిగినదే యాలు
కుతదీరుటకు రచ్చకొట్టమే యిల్లు। IIచిక్కుII

యెదురులేమికిఁ దనకేదైనఁ దలఁ పిది
మదమత్తునకుఁ దన మఱపే మాట
తుది పదమునకుఁ జేదోడైనవిభవము
పదిలపుశ్రీ వేంకటపతియే యెఱుక। IIచిక్కుII ౨-౬౩

ఆఁకటివేళల నలపైన వేళను

Get this widget | Track details | eSnips Social DNA

ముఖారి

ఆఁకటివేళల నలపైన వేళను
తేఁకువ శ్రీహరినామమే దిక్కు మఱిలేదు IIపల్లవిII

కొఱమాలి వున్నవేళ కులముచెడినవేళ
ఛెఱవడి వొరులచేఁ జిక్కినవేళ
వొఱపైన హరినామ మొక్కటే గతిగాక
మఱచి తప్పిననైన మఱిలేదు తెఱఁగు IIఆఁకటిII

ఆపదవచ్చినవేళ నాఱడిఁబడినవేళ
పాపపు వేళల భయపడిన వేళ
వోపినంత హరినామమొక్కటే గతిగాక
మాపుదాఁకాఁ బొరలిన మఱిలేదు తెఱఁగు IIఆఁకటిII

సంకెలఁ బెట్టినవేళ చంపఁబిలిచిన వేళ
అంకిలిగా నప్పులవా రాఁగినవేళ
వేంకటేశునామమే విడిపించ గతిగాక
మంకుబుద్ధిఁ బొరలిన మఱిలేదు తెఱఁగు IIఆఁకటిII