చెప్పరాని మహిమల శ్రీధరా నీవు

శ్రీరాగం
చెప్పరాని మహిమల శ్రీధరా నీవు
చెప్పినట్టు చేసేము శ్రీధరా. IIపల్లవిII

చేరఁ దీసి నా కన్నుల శ్రీధరా నీ
జీరల మేను చూచితి శ్రీధరా
చేరువ సంతోష మబ్బె శ్రీధరా
చీరుమూరాడీఁ (?) దమి శ్రీధరా. IIచేరII

చెల్లు నన్నియును నీకు శ్రీధరా నీ
చిల్లర సతులు వారే శ్రీధరా
చెల్లఁబో ఆ సుద్ది విని శ్రీధరా నాకు
చిల్లులాయె వీనులెల్లా శ్రీధరా. IIచేరII

సేవలు సేసేము నీకు శ్రీధరా మమ్ముఁ
జేవదేరఁ గూడితివి శ్రీధరా
చేవల్లకు రావోయి శ్రీధరా
శ్రీవేంకటాద్రిమీఁది శ్రీధరా। IIచేరII౧౫-౨౪౫