ఇంకనేల వట్టిజోలి యిందులోనే వున్నది

మాళవిగౌళ
ఇంకనేల వట్టిజోలి యిందులోనే వున్నది
తెంకినే ఆపెకిన్నియుఁ దెలుపఁగరాదా. IIపల్లవిII

కన్నుచూపే(పులే)వాండ్లైతే కడునొడ్డించుకొనేది
వెన్నెలలే వేండ్లైతే విచారమేది
కన్నె నిన్నడుగుమనెఁ గరుణించి యిఁకను మా
విన్నపము వినాడకు విచ్చేయరాదా IIఇంకII

నవ్వులే నాములెక్కితే నయమైన మందులేవి
పువ్వులే పోటుకువస్తే బుద్ధులేవి
జవ్వనిట్టె ఆడుమనె సముకమే యిద్దరికి
దవ్వులేల యించుకంత దగ్గరి రారాదా IIఇంకII

చల్లగాలి పగలైతే సందిమాటలిఁక నేవి
వల్లెతాడు వలపైతే వద్దననేది
ఇల్లి దె శ్రీ వేంకటేశ యింతి నీకుఁ జెప్పించె
లొల్లిఁ గూడితివిఁకను లోననుండరాదా. IIఇంకII ౭-౩౯౯

వినాడకు=విని+ఆడకు