దాఁచుకో నీ పాదాలకుఁ దగ నేఁ జేసిన పూజ లివి

గుండక్రియ
దాఁచుకో నీ పాదాలకుఁ దగ నేఁ జేసిన పూజ లివి
పూఁచి నీ కీరితిరూపపుష్పము లివి యయ్యా। ॥పల్లవి॥

వొక్క సంకీర్తనే చాలు వొద్దికై మమ్ము రక్షించఁగ
తక్కినవి భండారాన దాఁచి వుండనీ
వెక్కసమగు నీ నామము వెల సులభము ఫల మధికము
దిక్కై నన్నేలితి విఁక నవి తీరని నా ధనమయ్యా। ॥ దాఁచుక

నా నాలికపై నుండి నానా సంకీర్తనలు
పూని నాచే నిన్నుఁ బొగడించితివి
వేనామాల వెన్నుఁడా వినుతించ నెంతవాఁడ
కానిమ్మని నా కీపుణ్యము గట్టితి వింతేయయ్యా। ॥ దాఁచుకో॥

యీ మాట గర్వము కాదు నీ మహిమే కొనియాడితిఁగాని
చేముంచి నా స్వాతంత్ర్యము చెప్పినవాఁడఁ గాను
నేమానఁ బాడేవాఁడను నేరములెంచకుమీ
శ్రీమాధవ నే నీదాసుఁడ శ్రీవేంకటేశుఁడవయ్యా. ॥ దాఁచుకో॥ ౨-౩౩౮

చాలా ప్రసిద్ధమైన అన్నమయ్య కీర్తనలలో ఇది ఒకటి।
ఈ సంకీర్తనలు నీ పాదాలకు తగినవిధంగా నేను చేసిన పూజలివి। ఇవి నేను నీకు సమర్పించే పూచిన నీ కీర్తిరూపములైన పుష్పములయ్యా.
మమ్మల్ని ఒద్దికగా రక్షించడానికి వీటిలో ఒక్క సంకీర్తనే చాలు।తక్కినవి భండారాన దాచి వుండనీ।అధికమైన నీ నామము యొక్క వెల సులభము, ఫలమధికము।నీవు నాకు దిక్కై నన్ను ఏలావు।అవి నా తీరని ధనమయ్యా।
నా నాలికపై నిలచి నీవు పూనుకొని నాతోఎన్నో సంకీర్తనలతో నిన్ను పొగడించికొనినావు। వేయి నామాల వెన్నుడా నిన్నునుతించగా నే నెంతవాడను।నీవే కానిమ్మని నాకు ఈ పుణ్యాన్నికట్టావింతేనయ్యా।
ఈ మాట గర్వముతో చెబుతున్నది కాదు।నీ మహిమనే నేను కొనియాడేను కాని వేఱు కాదు।
చేముంచి(?) నా స్వాతంత్ర్యము చెప్పినవాడ కాను।నియమంతో పాడే వాడిని।నేరములెంచకువయ్యా। ఓ శ్రీ మాధవా! నేను నీ దాసుడనయ్యా!నీవు నా పాలి శ్రీవేంకటేశ్వరుడవు.